«Аймақтың асыл абызы» атты шығармашылық кеш

13 қазанда облыстық кітапханада ұстаздарымыздың бірегейі, асқан білімдарлығымен, ерекше парасаттылығы мен биік адамгершілік қасиеттерімен көңіл төрінен орын алған аймағымыздың асыл абызы, ақын, жазушы Зекебай Солтанбаевтың шығармашылығына арналған «Аймақтың асыл абызы» атты кеш өтті.
Зекебай Солтанбаев – Баянауыл ауданының «Құрметті азаматы», ұлағатты ұстаз, ардагер, ҚР ағарту ісінің үздік қызметкері, Ы. Алтынсарин медалінің иегері, ақын-жазушы, ҚР Жазушылар және Журналистер одағының мүшесі. Ақын қаламынан «Жыр жиһазы», Мәшһүр Жүсіп Көпеев туралы «Мəшһүр», «Жүсіп», «Көпеев», «Ғұлама», «Адам», Сұлтанмахмұт Торайғыров жайлы «Жалынды демократ» атты кітабы шықты.
Кешке Павлодар облысы мәдениет, тілдерді дамыту және архив ісі басқармасының басшысы Е.Н. Дәуенов, ақын, Қазақстан Жазушылар одағының мүшесі Ғалым Жайлыбай, ақын, «Алаш» әдеби сыйлығының иегері Арман Қани, ақын, жазушы, ҚР Журналистер одағының мүшесі С. Баязитов, ф.ғ.к., С. Торайғыров атындағы ПМУ доценті А.Ф. Зейноллина, «Найзатас» журналының бас редакторы Асыл Әбіш, З.Солтанбаевтың шәкірттері, туыстары, зиялы қауым өкілдері, журналистер қатысты.
Кеш барысында ҚР еңбек сіңірген мәдениет қайраткері Е. Айтбаев, Халықаралық және республикалық байқаулардың лауреаты Ә. Ботаева ән шырқап, ақынның немерелері өлеңдерін оқыды.
«Көркем сөз зергері» кітап көрмесінде З.Солтанбаевтың кітаптары мен шығармашылығы жайында мерзімді басылымдардағы материалдар таныстырылды.