«Біздің таулы өңірде» кітабының тұсаукесері

6 маусымда С.Баязитов атындағы балалар оқу орталығында С. Баязитовтың «Біздің таулы өңірде» атты жаңа кітабының тұсаукесері өтті. Белгілі жазушы, журналист, өлкетанушы және аудармашы, Қазақстан Жазушылар Одағының мүшесі 20-дан астам кітап шығарды. Ақынның «Жасыбай батыр», «Малайсары батырдың соңғы әзілі», «Бала Мәшһүр», «Шоң би», «Бәлду-бәлду-бәрі өтірік» кітаптары мен ертегілері жинағын балалар мен ересектер тамсанып оқиды.

Жаңа кітапқа соңғы жылдары С.Баязитовтың ертегілері, өлеңдері, жұмбақтары, аңыздары енгізілген. Кітапты отбасы мүшелері өз қаражатына шығарып, балалар оқу орталығына бірнеше данасын сыйға тартты. Тұсаукесер кешінде ПМУ профессоры Бақыт Қапасова, Қазақстан Жазушылар Одағының және Қазақстан Журналистер Одағының мүшесі Шолпан Байғалы, Қазақстан Жазушылар Одағының мүшесі Айбек Оралхан және басқалар сөз сөйледі.

Кітапхана оқырманы Ерасыл Нығметолла кітап туралы өз әсерімен бөлісті. Тұсаукесерге №37 мектеп пен Абай атындағы дарынды балаларға арналған гимназия оқушылары қатысты.