«Тұлғалар – ғажап жандар» кітабының тұсаукесері

26 маусымкүні С.Торайғыров атындағы облыстық кітапханада Павлодар облысының құрметті азаматы, Қазақстан Журналистер Одағының мүшесі, «Құрмет» орденінің иегері Ғалия Балтабайдың «Тұлғалар – ғажап жандар» атты кітабының тұсаукесері рәсімі болды.

30 жылға жуық Ғалия Құсайынқызы Астана қалалық Ардагерлер Кеңесінде «Медиа топ» жетекшісінің орынбасары. Қалалық «Астана ақшамы» газетіне Елорда ардагерлерінің жұмысы жайлы мақала жазып, қоғамдық жұмыстармен де айналысуда. Туған жері Павлодар облыстық «Сарыарқа самалы» газетіне павлодардың  ұлы перзенттері мен атақты адамдары жайлы мақалалар жазып тұрады. Оның балаларға арналған «Сары қыз» кітабын Астана, Павлодар қаласының мектептері сыныптан тыс сабақ ретінде оқуда. Журналист 20 шақты кітап жазған.

Бұл кеште облыс әкімінің атынан құттықтау сөзді Павлодар облысының ақпарат және қоғамдық даму басқармасының басшысы оқып берді. Павлодар облыстық мәслихатының төрағасы Ғ.Балтабайды құттықтап, «Алғыс хатпен» марапаттады. Кештің құрметті қонақтары филология ғылымдарының кандидаты, профессор Айман Зейнуллина, «Ертіс Медиа» ЖШС-нің директор орынбасары Раушан Сыбанжанова және т.б. құттықтаулар айтып, кітап туралы өз пікірлерін ортаға салды. Келген жұртшылық «Қарымды қаламгер, жалынды журналист» атты кітап көрмесін тамашалап, журналист - жазушының кітаптарымен танысты.  

Сонымен бұл кешке Павлодар облысының мәдениет, тілдерді дамыту және архив ісі басқармасының басшысы, жергілікті зиялық қауым, БАҚ өкілдері, журналистің замандастары қатысты.